Ir ao contido

O material dun proxecto

Cada proxecto indica que material usa dos que hai no inventario: os instrumentos, e tamén as cadeiras, os atrís ou o son. Se o proxecto ten programa, podes axustalo obra a obra, igual que fas co cadro de persoal músico.

  1. Entra no proxecto e abre Inventario no menú da esquerda.
  2. Verás todo o inventario agrupado por familias (madeiras, metais, percusión, corda e outros), na mesma orde na que se le un cadro de persoal.
  3. Preme os que use o proxecto. Podes marcar moitos seguidos.
  4. Preme Gardar. Gárdase todo dunha vez, non en cada clic.

Arriba tes o buscador e dous interruptores, que Weikos lembra para a próxima vez: Amosar tamén o material de escena engade abaixo, na súa propia tarxeta, as cadeiras, os atrís, o son e o demais; Amosar só os alugados deixa á vista o que non é voso.

Á dereita lese cantos levas asignados e o Aluguer estimado: … do proxecto, que suma o que custan os alugueres do que marcaches.

Se unha ficha ten varias unidades (cen atrís, sesenta cadeiras), o chip amósao. Ao marcalo, preme o número e escribe cantas usa este proxecto, ou escolle Todas (…).

Un triángulo ámbar na esquina do chip avisa de que outro proxecto usa o mesmo en datas que se solapan coas deste. Ao pasar por riba verás cal e entre que datas, e arriba aparece un resumo das coincidencias que tes marcadas.

É un aviso, non un impedimento: podes marcalo igual, porque se cadra os servizos non coinciden e organizádesvos. Weikos compara as datas do proxecto, non as de cada ensaio.

  1. Na barra de arriba, preme Alugar para este proxecto.
  2. Indica que instrumento é, a súa marca e, se o ten, o modelo.
  3. Completa o aluguer: provedor, prezo, unidades e a fianza se a hai. As datas veñen postas coas do proxecto.
  4. Preme Gardar.

A ficha entra no inventario como alugada, o aluguer queda asociado a este proxecto (así saberás sempre que se alugou para que) e o instrumento aparece xa marcado. Se despois non o usades, quítalo cun clic.

Desde o chip de algo alugado, a icona de etiqueta abre o seu aluguer para retocar o prezo ou as datas sen saír da pantalla.

Fáltache algo que non é de aluguer? Engadir ao inventario abre a mesma ficha completa dos axustes e déixao marcado no proxecto. E Ir ao inventario lévate á pantalla de Configuración.

Se o proxecto ten programa, á esquerda verás Material xeral e, debaixo, Material por obra coas obras na orde do programa.

  1. Marca primeiro o material xeral do proxecto e gárdao. Cada obra só pode escoller do que usa o proxecto: se o proxecto non leva timbais, non aparecerán nas súas obras.
  2. Preme Copiar o material ás obras para deixalas todas co mesmo. Avisa antes, porque substitúe o que tivese cada obra.
  3. Entra en cada obra e quita o que non corresponda.

Para marcar ou quitar dunha vez o que estás vendo (cos filtros e a busca postos) tes Marcar todo o que se ve e Quitar todo o que se ve.

Ao abrir unha obra, enriba do inventario sae Material necesario segundo o orgánico: unha fila por cada instrumento que pide o seu orgánico e que pon a institución (a percusión, os timbais, as arpas e os teclados), con cantos fan falta.

  1. En cada fila están as fichas do inventario dese tipo. Preme a que vaias usar; se só hai unha, asígnase soa. O que asignas aquí entra tamén no material xeral, aínda que non estivese marcado.
  2. O estado indica como vai: Cuberto, «Falta 1» ou Sen cubrir. Arriba, a barra de material cuberto.
  3. No menú ⋮ da fila tes + Outro do inventario, para usar unha ficha sen tipo; alugar; engadir ao inventario, co tipo xa posto; e Pono a sala, para o que achega o auditorio: deixa de contar.
  4. Preme Gardar.

En Material xeral, Material necesario do proxecto suma todas as obras e indica en cantas fai falta cada cousa. O que marcas aí cobre todas esas obras á vez: se o mesmo bombo serve para as catorce obras dunha zarzuela, márcalo unha vez. Dentro de cada obra, o que vén do xeral sae con bordo.

Se unha obra ten percusionistas pero o seu orgánico non indica que instrumentos, a tarxeta avísao e lévate a completalo.

A icona de descarga ofrece dúas listas:

  • Listaxe simple: familia, instrumento, marca, modelo e unidades. É a de cargar o camión.
  • Listaxe con todos os datos: engade titularidade, provedor, datas do aluguer e importes.

Se estás dentro dunha obra, a descarga trae só o material desa obra.

  • «Descargar» está apagado. Tes cambios sen gardar; sae Garda os cambios antes de exportar.
  • «Copiar o material ás obras» está apagado. Cópiase sempre desde o material xeral: sae da obra e garda o que teñas pendente.
  • Un instrumento non aparece dentro dunha obra. Non está marcado no material xeral do proxecto. Desde «Material necesario segundo o orgánico» si podes asignar calquera ficha dese tipo, e entra soa no xeral.
  • Unha fila indica Non hai no inventario. Non hai ningunha ficha dese tipo: engádea ou alúgaa desde o ⋮ da fila. Se a tes sen tipo, enlázaa con «+ Outro do inventario».
  • Non hai nada que marcar. Sae Non hai nada no inventario que asignar: dá de alta o material no inventario primeiro.